دنیا کی سب سے خترناک خاتون

وسعت اللہ خان کا کالم: دنیا کی سب سے خطرناک خاتون۔
 38 ﺑﺮﺱ ﮐﯽ ﻋﻮﺭﺕ ﮨﻢ ﺳﺐ ﮐﮯ ﻟﯿﮯ ﻣﺴﻠﺴﻞ ﺳﻨﮕﯿﻦ ﻧﻈﺮﯾﺎﺗﯽ ﺍﻭﺭ ﺍﺧﻼﻗﯽ ﭘﯿﭽﯿﺪﮔﯿﺎﮞ ﭘﯿﺪﺍ ﮐﺮ ﺭﮨﯽ ﮨﮯ۔ ﺍﺳﮯ ﺭﻭﮐﻨﮯ ﮐﯽ ﺍﺷﺪ ﺿﺮﻭﺭﺕ ﮨﮯ۔ ﯾﮧ ﻣﻠﺤﺪ ﻭ ﺑﮯ ﺑﺎﮎ ﻋﻮﺭﺕ ﺑﮯ ﺩﯾﻦ ﻭ ﺑﮯ ﻟﮕﺎﻡ ﻣﻐﺮﺑﯽ ﺗﮩﺬﯾﺐ ﮐﮯ ﺑﺎﺭﮮ ﻣﯿﮟ ﮨﻤﺎﺭﮮ ﺍﻧﺪﺍﺯﻭﮞ ﮐﻮ ﮔﺬﺷﺘﮧ ﻧﻮ ﺩﻥ ﺳﮯ ﻟﮕﺎﺗﺎﺭ ﮐﭽﻮﮐﮯ ﻟﮕﺎ ﺭﮨﯽ ﮨﮯ۔
ﯾﮧ ﻋﻮﺭﺕ ﺍﺱ ﻗﺪﺭ ﺭﻭﺍﺩﺍﺭﺍﻧﮧ ﻭ ﺍﻧﺴﺎﻥ ﻧﻮﺍﺯ ﺣﺮﮐﺘﻮﮞ ﭘﺮ ﺍﺗﺮ ﺁﺋﯽ ﮨﮯ ﮐﮧ ﺷﮏ ﮨﻮﻧﮯ ﻟﮕﺎ ﮨﮯ ﮐﮧ ﮐﮩﯿﮟ ﯾﮧ ﮈﺭﺍﻣﮧ ﺗﻮ ﻧﮩﯿﮟ؟ ﮐﻮﻥ ﺟﺎﻧﮯ ﻣﮩﺮﺑﺎﻧﯽ ﮐﮯ ﺍﺱ ﻣﺎﺳﮏ ﮐﮯ ﭘﯿﭽﮭﮯ ﺳﮯ ﺁﮔﮯ ﭼﻞ ﮐﺮ ﮐﯿﺎ ﻧﮑﻠﮯ؟
ﮐﻤﺰﻭﺭ ﺳﮯ ﺍﺗﻨﺎ ﭘﯿﺎﺭ؟ ﻏﻢ ﺯﺩﮦ ﮐﻮ ﺍﺗﻨﺎ ﺑﮭﯿﻨﭻ ﮐﺮ ﮔﻠﮯ ﻟﮕﺎﻧﺎ؟ ﺍﯾﺴﺎ ﺣﮑﻤﺮﺍﻥ ﺗﻮ ﺍﻟﻒ ﻟﯿﻼ ﮐﯽ ﺩﺍﺳﺘﺎﻧﻮﮞ ﻣﯿﮟ ﺑﮭﯽ ﻧﮩﯿﮟ ﻣﻠﺘﺎ۔ ﭘﺘﮧ ﺗﻮ ﮐﺮﻭ ﯾﮧ ﻋﻮﺭﺕ ﺁﺋﯽ ﮐﮩﺎﮞ ﺳﮯ ﮨﮯ؟
ﻭﺳﻌﺖ ﺍﻟﻠﮧ ﺧﺎﻥ ﮐﮯ ﺩﯾﮕﺮ ﮐﺎﻟﻢ ﭘﮍﮬﯿﮯ
ﺁﺧﺮ ﮐﺘﻨﮯ ﻣﺴﻠﻤﺎﻥ، ﮨﻨﺪﻭ، ﯾﮩﻮﺩﯼ، ﮐﺮﺳﭽﻦ ﺣﯿﻮﺍﻥ ﮨﯿﮟ؟
ﺍﻭﻧﭧ ﺳﻮﺋﯽ ﮐﮯ ﻧﺎﮐﮯ ﺳﮯ ﮔﺰﺭ ﺳﮑﺘﺎ ﮨﮯ
ﺟﺬﺑﺎﺗﯽ ﺳﻔﺎﺭﺕ ﮐﺎﺭﯼ ﻣﻀﺮِ ﺻﺤﺖ ﮨﮯ
ﺍﭘﻨﮯ ﺗﮭﭙﮍ ﺍﻭﺭ ﮔﺎﻟﯽ ﺳﮯ ﮈﺭﻭ ﻭﺭﻧﮧ ۔۔۔
ﺍﮮ ﻋﻮﺭﺕ ﺗﻮ ﺟﺲ ﺧﺪﺍ ﮐﻮ ﺑﮭﯽ ﺯﺭﺍ ﺳﺎ ﺑﮭﯽ ﻣﺎﻧﺘﯽ ﮨﮯ ﺍﺳﯽ ﺧﺪﺍ ﮐﺎ ﻭﺍﺳﻄﮧ، ﮨﻤﯿﮟ ﺭﻭﺯ ﺭﻭﺯ ﻧﺌﯽ ﺁﺯﻣﺎﺋﺶ ﻣﯿﮟ ﻣﺖ ﮈﺍﻝ۔ ﮨﻢ ﭘﺮ ﺣﺴﻦِ ﺳﻠﻮﮎ ﮐﮯ ﮐﻮﮌﮮ ﺑﺮﺳﺎﻧﮯ ﺳﮯ ﺑﺎﺯ ﺁ۔ ﺟﺲ ﻭﻗﺖ ﺗﻮ ﺑﯿﺲ ﮨﺰﺍﺭ ﻏﯿﺮ ﻣﺴﻠﻤﻮﮞ ﮐﮯ ﮨﻤﺮﺍﮦ ﺳﮑﺎﺭﻑ ﺑﺎﻧﺪﮬﮯ ﭘﺎﻧﭻ ﮨﺰﺍﺭ ﻧﻤﺎﺯﯾﻮﮞ ﮐﮯ ﮔﺮﺩ ﺣﺼﺎﺭ ﺑﺎﻧﺪﮬﮯ ﮐﮭﮍﯼ ﺗﮭﯽ، ﻋﯿﻦ ﺍﺳﯽ ﻭﻗﺖ ﮨﻮﻟﯽ ﮐﮯ ﺩﻥ ‏( ﻣﺒﯿﻨﮧ ﻃﻮﺭ ﭘﺮ ‏) ﺍﻏﻮﺍ ﮨﻮﻧﮯ ﻭﺍﻟﯽ ﺩﻭ ﮨﻨﺪﻭ ﻟﮍﮐﯿﻮﮞ ﮐﺎ ﺑﺎﭖ ﮈﮨﺮﮐﯽ ﮐﮯ ﺍﯾﮏ ﺗﮭﺎﻧﮯ ﮐﮯ ﺻﺤﻦ ﻣﯿﮟ ﺍﭘﻨﺎ ﭼﮩﺮﮦ ﺍﭘﻨﮯ ﮨﯽ ﺑﮯ ﺑﺲ ﺗﮭﭙﮍﻭﮞ ﺳﮯ ﻻﻝ ﮐﺮ ﺭﮨﺎ ﺗﮭﺎ ﺍﻭﺭ ﭘﻮﻟﯿﺲ ﻭﺍﻟﮯ ﻻﺗﻌﻠﻖ ﺁ ﺟﺎ ﺭﮨﮯ ﺗﮭﮯ۔
ﺟﻮ ﭘﭽﺎﺱ ﻧﻤﺎﺯﯼ ﻣﺮ ﮔﺌﮯ ﺳﻮ ﻣﺮ ﮔﺌﮯ۔ ﮨﻤﺎﺭﮮ ﮨﺎﮞ ﺗﻮ ﮐﺌﯽ ﮨﺰﺍﺭ ﻣﺮ ﭼﮑﮯ۔
ﺍﭼﮭﺎ ! ﺍﺏ ﮐﭽﮫ ﮐﭽﮫ ﺳﻤﺠﮫ ﻣﯿﮟ ﺁ ﺭﮨﺎ ﮨﮯ۔ ﺑﺎﺕ ﯾﮧ ﮨﮯ ﮐﮧ ﺩﻧﯿﺎ ﮐﮯ ﺍﯾﮏ ﺍﻧﺘﮩﺎﺋﯽ ﮐﻮﻧﮯ ﻣﯿﮟ ﭘﮍﮮ ﺗﯿﺮﮮ ﻣﻠﮏ ﻣﯿﮟ ﮐﺒﮭﯽ ﺍﯾﮏ ﺳﺎﺗﮫ ﺍﺗﻨﯽ ﮨﻼﮐﺘﯿﮟ ﻧﮩﯿﮟ ﮨﻮﺋﯿﮟ ﺍﺳﯽ ﻟﯿﮯ ﺗﻮ ﯾﮧ ﺳﺐ ﻣﮩﺮﺑﺎﻧﯿﺎﮞ ﮐﺮﺗﯽ ﭘﮭﺮ ﺭﮨﯽ ﮨﮯ۔ ﺧﺪﺍ ﻧﮧ ﮐﺮﮮ ﺗﯿﺮﮮ ﮨﺎﮞ ﺍﯾﮏ ﺩﻥ ﮐﮯ ﺑﺠﺎﺋﮯ ﮐﺌﯽ ﺑﺮﺱ ﺗﮏ ﺭﻭﺯﺍﻧﮧ ﭘﭽﺎﺱ ﻣﺮﯾﮟ ﺗﺐ ﭘﻮﭼﮭﯿﮟ ﮔﮯ ﺗﺠﮫ ﺳﮯ ﻣﮩﺮﺑﺎﻧﯽ ﻭ ﺍﻧﺴﺎﻥ ﺩﻭﺳﺘﯽ ﮐﮯ ﺁﭨﮯ ﺩﺍﻝ ﮐﺎ ﺑﮭﺎﺅ۔
ﯾﮧ ﺑﮭﯽ ﺗﻮ ﻣﻤﮑﻦ ﮨﮯ ﮐﮧ ﻣﺤﻤﺪ ﻋﻠﯽ ﺟﻨﺎﺡ ﮐﯽ ﮔﯿﺎﺭﮦ ﺍﮔﺴﺖ ﺍﻧﯿﺲ ﺳﻮ ﺳﯿﻨﺘﺎﻟﯿﺲ ﮐﯽ ﺩﺳﺘﻮﺭ ﺳﺎﺯ ﺍﺳﻤﺒﻠﯽ ﮐﯽ ﺗﻘﺮﯾﺮ ﺟﻮ ﮨﻢ ﺳﮯ ﮐﮩﯿﮟ ﮔﻢ ﮨﻮ ﮔﺌﯽ ﻭﮦ ﮐﺴﯽ ﻧﮯ ﺍﺱ ﻋﻮﺭﺕ ﮐﻮ ﺳﻤﮕﻞ ﮐﺮ ﺩﯼ ﮨﻮ۔
ﺍﻭﺭ ﭘﻠﯿﺰ ﺑﻨﺪ ﮐﺮﻭ ﺍﺱ ﻋﻮﺭﺕ ﮐﯽ ﺗﻌﺮﯾﻒ ﮐﺎ ﻧﺎﭨﮏ۔ ﻣﺖ ﻭﺍﮦ ﻭﺍﮦ ﮐﺮﻭ ﺍﺱ ﭘﺮ ﮐﮧ ﺍﺱ ﻧﮯ ﺻﺮﻑ ﺍﯾﮏ ﻓﯿﺼﺪ ﻣﺴﻠﻤﺎﻥ ﺍﻗﻠﯿﺖ ﮐﯽ ﺩﻟﺠﻮﺋﯽ ﮐﮯ ﻟﯿﮯ ﭘﺎﺭﻟﯿﻤﻨﭧ ﻣﯿﮟ ﺍﭘﻨﮯ ﺩﻝ ﺳﻮﺯ ﺧﻄﺎﺏ ﺳﮯ ﭘﮩﻠﮯ ﺗﻼﻭﺕِ ﻗﺮﺁﻥ ﮐﺮﻭﺍﺋﯽ۔ ﮐﯿﺎ ﻟﻮﮎ ﺳﺒﮭﺎ ﺍﻭﺭ ﻗﻮﻣﯽ ﺍﺳﻤﺒﻠﯽ ﻣﯿﮟ ﻏﯿﺮ ﻣﺴﻠﻤﻮﮞ ﮐﮯ ﻗﺘﻞِ ﻋﺎﻡ ﭘﺮ ﺑﺎﺋﺒﻞ ﯾﺎ ﮔﯿﺘﺎ ﮐﯽ ﺗﻼﻭﺕ ﻣﻤﮑﻦ ﮨﮯ؟
ﮐﯿﺎ ﺯﺑﺮﺩﺳﺖ ﺑﺎﺕ ﮨﮯ ﮐﮧ ﺍﺱ ﻧﮯ ﺍﭘﻨﯽ ﺗﻘﺮﯾﺮ ﮐﮯ ﺷﺮﻭﻉ ﺍﻭﺭ ﺁﺧﺮ ﻣﯿﮟ ﮐﮩﺎ ﺍﺳﻼﻡ ﻭ ﻋﻠﯿﮑﻢ۔ ﮐﯿﺎ ﺍﯾﺴﮯ ﮐﺴﯽ ﻭﺍﻗﻌﮯ ﮐﮯ ﺑﻌﺪ ﻣﻮﺩﯼ ﺍﺳﻼﻡ ﻭ ﻋﻠﯿﮑﻢ ﺍﻭﺭ ﻋﻤﺮﺍﻥ ﺧﺎﻥ ﻧﻤﺴﮑﺎﺭ ﮐﮩﯿﮟ ﮔﮯ؟
ﯾﺎﺩ ﮨﮯ ﮔﺠﺮﺍﺕ ﮐﺎ ﺩﻭ ﮨﺰﺍﺭ ﺩﻭ ﮐﺎ ﻣﺴﻠﻢ ﻗﺘﻞِ ﻋﺎﻡ، ﺍﺱ ﻣﻮﻗﻊ ﭘﺮ ﻣﻮﺩﯼ ﻧﮯ ﺍﯾﮏ ﺳﻮﺍﻝ ﮐﮯ ﺟﻮﺍﺏ ﻣﯿﮟ ﺩﻝ ﭘﺮ ﮐﺘﻨﺎ ﺟﺒﺮ ﮐﺮﺗﮯ ﮨﻮﺋﮯ ﮐﮩﺎ ﺗﮭﺎ ’ ﮐﺘﮯ ﮐﺎ ﭘﻼ ﺑﮭﯽ ﻣﺮ ﺟﺎﺋﮯ ﺗﻮ ﺩﮐﮫ ﺗﻮ ﮨﻮﺗﺎ ﮨﮯ۔ ‘
ﭘﺸﺎﻭﺭ ﮐﮯ ﭼﺮﭺ ﻣﯿﮟ ﻟﮓ ﺑﮭﮓ ﻧﻮﮮ ﻣﺴﯿﺤﯽ ﺍﻓﺮﺍﺩ ﮐﺎ ﻗﺘﻞ۔ ﺍﺱ ﮐﮯ ﺑﻌﺪ ﺍﺳﻼﻡ ﺁﺑﺎﺩ ﺳﮯ ﺑﺲ ﺍﯾﮏ ﺳﺎﺋﯿﮑﻠﻮ ﺳﭩﺎﺋﯿﻞ ﭘﯿﻐﺎﻡ ﺟﺎﺭﯼ ﮨﻮﺍ ’ ﮨﻢ ﺍﭘﻨﮯ ﻣﺴﯿﺤﯽ ﺑﮭﺎﺋﯿﻮﮞ ﮐﮯ ﺩﮐﮫ ﻣﯿﮟ ﺑﺮﺍﺑﺮ ﮐﮯ ﺷﺮﯾﮏ ﮨﯿﮟ ‘ ﺑﺎﺕ ﺧﺘﻢ ،ﻓﺮﺽ ﭘﻮﺭﺍ۔
ﺍﻭﺭ ﻻﮨﻮﺭ ﮐﯽ ﺩﻭ ﻋﺒﺎﺩﺕ ﮔﺎﮨﻮﮞ ﻣﯿﮟ ﺳﻮ ﮐﮯ ﻟﮓ ﺑﮭﮓ ﺍﺣﻤﺪﯾﻮﮞ ﮐﺎ ﻗﺘﻞ۔ ﺍﻧﮩﯿﮟ ﺑﮩﻦ ﺍﻭﺭ ﺑﮭﺎﺋﯽ ﮐﮩﻨﮯ ﭘﺮ ﮐﺴﯽ ﺍﻭﺭ ﻃﺮﻑ ﺳﮯ ﺍﻧﮕﻠﯽ ﺍﭨﮭﻨﮯ ﺳﮯ ﭘﮩﻠﮯ ﮨﯽ ﻧﻮﺍﺯ ﺷﺮﯾﻒ ﮐﯽ ﺍﭘﻨﯽ ﭘﺎﺭﭨﯽ ﻣﯿﮟ ﺍﭘﻨﮯ ﮨﯽ ﻗﺎﺋﺪ ﮐﮯ ﺧﻼﻑ ﻏﺼﮯ ﮐﯽ ﻟﮩﺮ ﺩﻭﮌ ﮔﺌﯽ ﺗﮭﯽ۔ ﺍﺱ ﮐﮯ ﺑﻌﺪ ﻣﯿﺎﮞ ﺟﯽ ﮐﺎ ﮐﺴﯽ ﺳﻮﮔﻮﺍﺭ ﮐﮯ ﮔﮭﺮ ﺟﺎﻧﺎ ﺗﻮ ﺩﺭﮐﻨﺎﺭ ﺍﻥ ﻋﺒﺎﺩﺕ ﮔﺎﮨﻮﮞ ﮐﮯ ﻗﺮﯾﺐ ﺳﮯ ﺑﮭﯽ ﻧﮧ ﮔﺰﺭﮮ۔
ﭘﭽﺎﺱ ﺷﮩﺎﺩﺗﻮﮞ ﮐﮯ ﺻﺮﻑ ﭼﮫ ﺭﻭﺯ ﺑﻌﺪ ﻧﯿﻮﺯﯼ ﻟﯿﻨﮉ ﻣﯿﮟ ﺧﻮﺩﮐﺎﺭ ﻭ ﻧﯿﻢ ﺧﻮﺩﮐﺎﺭ ﮨﺘﮭﯿﺎﺭﻭﮞ ﭘﺮ ﭘﺎﺑﻨﺪﯼ ﻟﮓ ﮔﺌﯽ ﺍﻭﺭ ﺍﺏ ﯾﮧ ﮨﺘﮭﯿﺎﺭ ﺷﮩﺮﯼ ﺧﻮﺷﯽ ﺧﻮﺷﯽ ﺟﻤﻊ ﮐﺮﻭﺍ ﺭﮨﮯ ﮨﯿﮟ۔ ﻭﺍﮦ ﻭﺍﮦ ﮐﯿﺎ ﺑﺎﺕ ﮨﮯ ﻧﯿﻮﺯﯼ ﻟﯿﻨﮉ ﮐﯽ۔ ﻣﮕﺮ ﮐﺎﮨﮯ ﮐﯽ ﻭﺍﮦ ﻭﺍﮦ؟
ﺁﺭﻣﯽ ﭘﺒﻠﮏ ﺍﺳﮑﻮﻝ ﻣﯿﮟ ﮈﯾﮍﮪ ﺳﻮ ﺷﮩﺎﺩﺗﻮﮞ ﮐﮯ ﺑﻌﺪ ﮐﯿﺎ ﮐﮩﺎ ﮔﯿﺎ ﺗﮭﺎ؟ ﺷﺪﺕ ﭘﺴﻨﺪﯼ ﺳﮯ ﭘﺎﮎ ﻣﻠﮏ ﮐﮧ ﺟﺲ ﻣﯿﮟ ﮐﺴﯽ ﻣﺴﻠﺢ ﮔﺮﻭﮦ ﮐﻮ ﺑﺮﺩﺍﺷﺖ ﻧﮩﯿﮟ ﮐﯿﺎ ﺟﺎﺋﮯ ﮔﺎ۔ ﮐﺘﻨﮯ ﺑﺮﺱ ﮨﻮ ﮔﺌﮯ ﺍﺱ ﻭﻋﺪﮮ ﮐﻮ؟ ﭘﺎﻧﭻ ﺑﺮﺱ؟ ﭘﮭﺮ ﺑﮭﯽ ﺁﻓﺮﯾﻦ ﺁﻓﺮﯾﻦ ﺟﯿﺴﻨﮉﺍ ﺁﺭﮈﺭﻥ ﺍﻭﺭ ﻭﮦ ﺑﮭﯽ ﺍﺳﯽ ﻣﻨﮧ ﺳﮯ؟
ﺩﯾﮑﮭﻮ ﭘﯿﺎﺭﯼ ﺟﯿﺴﻨﮉﺍ ﮨﻤﺎﺭﺍ ﺍﻭﺭ ﺍﻣﺘﺤﺎﻥ ﻣﺖ ﻟﻮ، ﺍﭘﻨﮯ ﺑﺎﺭﮮ ﻣﯿﮟ ﺍﻭﺭ ﮐﻨﻔﯿﻮﺯ ﻣﺖ ﮐﺮﻭ، ﮨﻤﺎﺭﯼ ﺑﮭﯽ ﺟﻨﻮﺑﯽ ﺍﯾﺸﯿﺎﺋﯽ ﺍﻗﻠﯿﺘﯿﮟ ﮨﯿﮟ، ﺗﻢ ﺗﻮ ﮐﻞ ﮐﻼﮞ ﭼﻠﯽ ﺟﺎﺅ ﮔﯽ۔ ﺍﻥ ﮐﮯ ﺍﺭﻣﺎﻧﻮﮞ، ﺁﺳﻮﮞ، ﺍﻣﯿﺪﻭﮞ ﮐﺎ ﮐﯿﺎ ﮨﻮ ﮔﺎ، ﮐﯿﺎ ﺍﻧﮩﯿﮟ ﺑﮭﯽ ﺳﺎﺗﮫ ﻟﮯ ﺟﺎﺅ ﮔﯽ؟ ﺟﺘﻨﺎ ﮐﺮ ﻟﯿﺎ ﺑﮩﺖ ﮨﮯ۔ ﻣﺎﻥ ﻟﯿﺎ ﺗﻤﮩﺎﺭﯼ ﻣﮩﺎﻧﺘﺎ ﮐﻮ، ﺍﺏ ﺑﺲ، ﺁﭖ ﮐﯽ ﺑﮩﺖ ﻣﮩﺮﺑﺎﻧﯽ۔ ﺍﺏ ﺍﻭﺭ ﮐﺘﻨﺎ ﮔﻨﺎﮦ ﮔﺎﺭ ﮐﺮﻧﺎ ﭼﺎﮨﺘﯽ ﮨﻮ۔
ﭼﻠﻮ ﺗﻤﮩﺎﺭﯼ ﺩﻝ ﺟﻮﺋﯽ ﮐﮯ ﻟﯿﮯ ﮨﻢ ﺍﯾﮑﺘﺎ ﺍﻭﺭ ﺍﻧﺴﺎﻧﯿﺖ ﮐﮯ ﻣﻮﺿﻮﻉ ﭘﺮ ﻟﻤﺒﯽ ﺑﺤﺮﻭﮞ ﻣﯿﮟ ﮐﭽﮫ ﻣﺰﯾﺪ ﺗﺎﺯﮦ ﻧﻈﻤﯿﮟ ﮐﮩﮯ ﺩﯾﺘﮯ ﮨﯿﮟ ﺍﻭﺭ ﻭﮦ ﺑﮭﯽ ﻭﺯﻥ ﻣﯿﮟ۔۔۔۔

Post a Comment

0 Comments